Revnath, Kcr | రాష్ట్రంలో ఓ వైపు ఎండ‌లు మండిపోతుండ‌గా.. మ‌రోవైపు ప్ర‌ధాన పార్టీల నేత‌ల‌ డైలాగ్స్ పాలిటిక్స్ ను హీటెక్కించాయి. కాళేశ్వ‌రం ప‌ర్య‌ట‌న‌లో సీఎం రేవంత్ రెడ్డి (Revanth reddy) బీఆర్ఎస్‌పై విరుచుకుప‌డ‌గా.. జ‌గిత్యాల స‌భ‌లో కేసీఆర్ (Kcr) కాంగ్రెస్ పాల‌న‌పై మండిప‌డ్డారు. ఒకే రోజు రెండు స‌భ‌ల్లో సీఎం, మాజీ సీఎం మాట‌ల‌ తూటాలు పేల్చారు. స‌వాళ్లు, ప్ర‌తిస‌వాళ్లు విసురుకున్నారు. వ‌చ్చేది బీఆర్‌ఎస్ ప్ర‌భుత్వ‌మే అని గులాబీ బాస్ అంటే.. ప్ర‌తి ప‌క్షం కూడా ద‌క్క‌కుండా చేస్తాన‌ని రేవంత్ స్ప‌ష్టం చేయ‌డం గ‌మ‌నార్హం.

సీఎం రేవంత్ ఇలా..
‘తోడెలు బ‌య‌టకెళ్లింది.. ఆ గుండెల‌ద‌రాలే.. ‘ అంటూ కేసీఆర్ ను ఉద్దేశించి స్పీచ్ మొద‌లుపెట్టిన సీఎం రేవంత్‌.. జీవ‌న్‌రెడ్డి తాజా వ్యాఖ్య‌ల‌పై తీవ్రంగా మండిప‌డ్డారు. ‘ ప్ర‌జా పాల‌న ఎందుకు పోవాలె.. పామ్ హౌస్‌ల పండుకున్న పాపాలభైర‌వుడు ఎందుకు అధికారంలోకి రావాలే..’ అంటూ కాంగ్రెస్ నుంచి పోయిన జీవ‌న్‌రెడ్డిని త‌న‌దైన శైలిలో అరుసుకున్నారు. ‘ నువ్వు.. ఓ పెద్ద మ‌నిషివా ‘ అంటూ ఎద్దేవా చేశారు. ఇక కేసీఆర్‌ను ప్ర‌స్తావిస్తూ.. ‘ కాళేశ్వ‌రం పేరిట రూ.ల‌క్ష కోట్ల గోదారిలో క‌లిపితివి.. క‌డుపు మండుతంది.. ఆట‌విక రాజ్య‌మైతే అడ‌విలో చెట్టుకు ఉరేసేటోళ్లు.. నిజాం స‌ర్కారైతే ఊర్ల కోదండ‌మేసి.. లాగుల తొండ‌లిడిసేటోళ్లు..’ అంటూ తీవ్ర ప‌ద‌జాలంతో విరుచుకుప‌డ్డారు. ‘ వ‌చ్చే ఎన్నిక‌ల్లో నీకున్న ప్ర‌తిప‌క్ష హోదా కూడా ఊడ‌గొట్ట‌కుంటే నా పేరు మార్చ‌కుంట బిడ్డ.. 2023లో నిన్ను ఓడ‌గొట్టిన‌.. 2024నీకు గుండు సున్న ఇచ్చిన‌.. స‌ర్పంచ్ ఎన్నిక‌ల్లో పాత‌రేసిన‌.. మున్సిప‌ల్ ఎన్నిక‌ల్లో ఉక్కు పాత‌రేసిన.. జూబ్లిహిల్స్‌, కంటోన్‌మెంట్‌లో నీకు ఘోరి క‌ట్టిన‌.. వ‌చ్చేసారి ఆ ఘోరి మీద మా కార్య‌క‌ర్త‌లు కాంగ్రెస్‌ జెండా ఎగ‌రేస్త‌రు.. ఇదే నా స‌వాల్‌..’ అంటూ స్ప‌ష్టం చేసిన‌ సీఎం.. ‘ ఇగ చూసుకుందాం కేసీఆర్.. వ‌చ్చే ఎన్నిక‌ల్లో నువ్వా..నేనా .. ప్ర‌జా పాల‌నా.. పాపాల బైర‌వుడా..’ అంటూ స‌వాల్ విసిరారు. ‘ ఎన్నిక‌లెప్పుడొచ్చినా రాసిపెట్టుకో.. జ‌గిత్యాలలో నిన్ను రాజ‌కీయంగా వంద మీట‌ర్ల గోతి తీసి పాత‌రేసే కార్య‌క్ర‌మం మా కార్త‌క‌ర్త‌లు తీసుకుంటరు..’ అని తీవ్రంగా విమ‌ర్శించారు. ‘ఏడాది ఓపిక ప‌ట్ట‌లేక శ‌త్రువుతో చేతులు క‌లిపిన జీవ‌న్‌రెడ్డికి సిగ్గుండాలే ..’అంటూ ఘాటుగా స్పందించారు.

కేసీఆర్ ఇలా..
‘ ఆరు నూరైనా వ‌చ్చేది బీఆర్ఎస్ ప్ర‌భుత్వ‌మే.. అప్పుడు జీవ‌న్‌రెడ్డి మంచి ప‌ద‌విలో ఉంటార‌ని..’ ప్ర‌సంగం షురూ చేసిన గులాబీ బాస్ తెలంగాణ ఉద్య‌మ ప్ర‌స్తానాన్ని త‌న‌దైన శైలిలో వివ‌రించారు. కాంగ్రెస్ పాల‌న‌లో వైఫ‌ల్యాల‌ను ఎండ‌గ‌ట్టారు. ‘ గ‌తంలో ప్ర‌తీ ఇంటికి మిష‌న్ భ‌గీర‌థ నీళ్లిచ్చిన‌మ్‌.. ఇప్ప‌డేం రోగం పుట్టింది.. ఇప్పుడెందుకు ఆ ప‌థ‌కం కుంటుతంది.. ఎందుకు నీళ్లు వ‌స్త‌లేవు.. దీనికి చేయాల్సింది ఒక్క‌టే.. లాగులు ప‌లిగేదాకా సంపాలె.. క‌ట్టిన ఇల్లు.. పెట్టిన పొయ్యి.. ఐదేండ్లు న‌డిచింది గ‌దా.. మరి మీకేం బీమారొచ్చంది.. నాక‌ర్థం కాదు.. ఇంతింత మాట‌లు.. అడ్డం.. పొడుగు మాట్లాడొత్త‌దా.. పొద్దున్లేత్తే కేసీఆర్ చావాలె.. నువ్వు వెయ్యి జ‌న్మ‌లెత్తినా నేను చావ‌ను నా కొడ‌కా.. అనుకుంటున్నావేమో.. పిల్లి శాపానికి ఉట్టి తెగుత‌దా.. ఈ వెద‌వ‌లు కేసీఆర్ సావాలంటే కేసీఆర్ స‌త్త‌డా..’ అంటూ తనదైన శైలిలో వ్యంగ్యాస్త్రాలు సంధించారు. ఇక‌ ‘బోడ‌గుండు హైడ్రాను తెచ్చి ఆగ‌మాగం చేస్తుండ్రు.. బీఆర్ఎస్ గ‌వ‌ర్నమెంట్ రాగానే దానిని ఎత్తి అవ‌త‌ల పడేస్త‌..’ అంటూ త‌న మార్కు పంచులతో శ్రేణుల్లో జోష్ పెంచారు గులాబీ బాస్‌.

ఇది కూడా చదవండి :  రేవంత్ కాంగ్రెస్.. 

Kavitha party | ఏప్రిల్ 25.. క‌విత కొత్త పార్టీ ఆవిర్భావం. మునీరాబాద్ వేదికగా పార్టీ జెండా, అజెండా ప్రకటిస్తామ‌ని తెలంగాణ జాగృతి అధ్య‌క్షురాలు ఇప్ప‌టికే ప్ర‌క‌టించారు. ఆ తేదీ స‌మీపిస్తున్న‌ త‌రుణంలో చేరికలు ఊపందుకుంటున్నాయి. తాజాగా మాజీ మంత్రులు, మాజీ ఎమ్మెల్యేలు సైతం ఆమెతో ట‌చ్‌లోకి వచ్చిన‌ట్లు తెలుస్తోంది. ఇప్ప‌టి వ‌ర‌కు పేరున్ననేత‌లు ముందుకు రాక‌పోవ‌డంతో తాజా ప‌రిణామాలు రాజ‌కీయ వ‌ర్గాల్లో ఆస‌క్తి క‌ల‌గిస్తున్నాయి.
అన్ని పార్టీల నుంచి..?
కేసీఆర్ త‌న‌య కావ‌డంతో పాటు ఉద్య‌మ స‌మ‌యంలో జాగృతి ద్వారా బ‌తుక‌మ్మ ఫేంగా నిలిచిన‌ క‌వితకు రాష్ట్రవ్యాప్తంగా గుర్తింపు ఉంది. బీఆర్ ఎస్ నుంచి బ‌య‌ట‌కు వ‌చ్చాక చాలా మంది పేరున్న నేత‌లు త‌న‌తో ట‌చ్‌లో ఉన్న‌ట్లు ఆమె గ‌తంలోనే ప్ర‌క‌టించారు. అయితే వారి పేర్లు మాత్రం వెల్ల‌డంచలేదు. కొత్త పార్టీ ఏర్పాటుకు స‌మ‌యం ఆస‌న్నం కావ‌డంతో ఆయా నేత‌లు ప్ర‌స్తుతం తామున్న పార్టీల నుంచి బ‌య‌ట‌కు వ‌స్తున్న‌ట్లు తెలుస్తోంది. వీరిలో ఎక్కువ‌గా ప్ర‌ధాన పార్టీలకు చెందిన వారు ఉన్న‌ట్లుగా స‌మాచారం.
బోథ్ మాజీ ఎమ్మెల్యే రాథోడ్ బాపూరావ్‌..
ఆదిలాబాద్ జిల్లా బోథ్ మాజీ ఎమ్మెల్యే రాథోడ్ బాపూరావ్ ఆదివారం జాగృతిలో చేరారు. ఈయ‌న ప్ర‌స్తుతం కాంగ్రెస్‌లో ఉన్నారు. ఆ పార్టీకి రాజీనామా చేసి క‌విత స‌మ‌క్షంలో జాగృతి కండువా క‌ప్పుకున్నారు. దీంతో ఒక్క‌సారిగా ప్ర‌ధాన పార్టీల్లో అల‌జడి మొద‌లైంది. ఇప్ప‌టి వ‌రకు పేరున్న నేత‌ల జాయినింగ్ లేక‌పోవ‌డంతో ప్ర‌ధాన పార్టీలు పెద్ద‌గా ప‌ట్టించుకోలేదు. తాజా ప‌రిణామాల‌తో అల‌ర్ట్ అవుతున్న‌ట్లు తెలుస్తోంది. అయితే బీఆర్ఎస్ నుంచి ఎక్కువ చేరిక‌లు ఉండే అవకాశం ఉన్న‌ట్లు తెలుస్తోంది. కాగా, ఇటీవ‌ల‌ నడిగడ్డ హక్కుల పోరాట సమితి అధ్యక్షుడు గొంగళ్ల రంజిత్ కుమార్ భారీ అనుచర గ‌ణంతో జాగృతిలో చేరిన విష‌యం తెలిసిందే.
డీలిమిటేషన్ లేకపోవడంతో..
ఈసారి రానున్న అసెంబ్లీ, పార్లమెంట్‌ ఎన్నికలు డీలిమిటేషన్ ఆధారంగా ఉంటాయని నిన్న మొన్నటి వరకు ఆయా రాజకీయ పార్టీలు ప్రకటించిన విషయం తెలిసిందే. అయితే తాజాగా ఎన్డీఏ ప్ర‌భుత్వం పార్లమెంట్‌లో ప్రవేశపెట్టిన 131వ రాజ్యాంగ సవరణ బిల్లు వీగిపోయిన విషయం తెలిసిందే. దీంతో నియోజకవర్గాలు పెరుగుతాయని ఆశపడ్డ చాలామందికి నిరాశే ఎదురైంది. ఆయా నియోజకవర్గాల నుంచి పోటీకి ఆసక్తి చూపుతున్న వారు ప్రత్యామ్నాయాల వైపు దృష్టి సారిస్తున్నారు. దాదాపు ప్ర‌ధాన రాజకీయ పార్టీల్లో ఇప్పుడున్న స్థానాల్లో పోటీ ఉండడంతో భవిష్యత్ పరిణామాలను బెరీజు వేసుకుంటూ ప‌లువురు దారులు వెతుక్కుంటున్నారు. అనువైన వేదికలను ఎంచుకుంటున్నారు. కొత్త పార్టీల వైపు ఆసక్తి చూపుతున్నారు. ఈ క్ర‌మంలో అంద‌రి చూపు జాగృతి వైపు ప‌డింది. మున్ముందు చేరిక‌లు ఎలా ఉంటాయో వేచి చూడాల్సిందే.

ఇది కూడా చదవండి :  రేవంత్ కాంగ్రెస్..!

Mark politcs | కాంగ్రెస్.. తెలంగాణ రాష్ట్రం ఇచ్చిన పార్టీ. అయినా పదేళ్ల పాటు ప్రతిపక్షానికే పరిమితం కావాల్సి వచ్చింది. క్షేత్రస్థాయిలో కేడర్ ఉన్నా సమన్వయ పరిచే లీడర్ లేడనే విమర్శలు వెల్లువెత్తాయి. వరుసగా రెండుసార్లు అధికారం చేపట్టిన గులాబీ పార్టీ తమకు ఎదురు లేదనుకుని దేశ రాజకీయాల వైపు దృష్టి సారించింది. ఈ క్రమంలో ‘హస్తం’ అందుకున్న రేవంత్.. రాష్ట్రంలో మూడు రంగుల జెండాను రెపరెపలాడించారు. ముఖ్యమంత్రిగా కొలువుదీరి.. గులాబీ బాస్ ను ‘హౌస్’కు పరిమితం చేశారు.
మార్క్ చూపుతూ..
కాంగ్రెస్ రాజ‌కీయాల్లో సీఎం రేవంత్ మార్క్ చూపుతున్నారు. పార్టీలో పాతుకుపోయిన‌ వ‌ర్గ‌పోరు, అంత‌ర్గ‌త కుమ్ములాట‌లకు చెక్ పెడుతూనే.. విప‌క్షాల‌కు పంచ్ డైలాగ్‌లతో చుక్క‌లు చూపుతున్నారు. పాలి’ట్రిక్స్‌’కు ప‌దునుపెడుతూ ఉద్య‌మ‌నేత‌ల‌కు ముచ్చెమ‌ట‌లు ప‌ట్టిస్తున్నారు. రాష్ట్రంలోనే కాదు.. దేశ రాజ‌కీయాల్లోనూ చ‌తురుత ప్ర‌దర్శిస్తూ అధిష్టానానికి చేరువ‌వుతున్నారు. రాజ‌న్న మాదిరిగా రే’వ‌న్’తన్న‌గా మారాల‌ని త‌హ‌త‌హ‌లాడుతున్నారు.
కౌంట‌ర్ స‌భ‌కు శ్రీ‌కారం..
సీనియ‌ర్ నేత జీవ‌న్‌రెడ్డి ఇటీవ‌ల కాంగ్రెస్ ను వీడారు. ‘కారు’ గూటికి చేరువ‌య్యారు. ఈ క్ర‌మంలో సోమ‌వారం జ‌గిత్యాల స‌భ ద్వారా ఆయ‌న గులాబీ కండువా క‌ప్పుకోనున్నారు. అధికారం కోల్పోయాక‌ ఎక్కువగా ఫాంహౌస్‌కే ప‌రిమిత‌మైన కేసీఆర్ (Kcr) చాలాకాలం త‌ర్వాత ఈ స‌భ‌కు హాజ‌రుకానున్నారు. అసెంబ్లీ ఎన్నిక‌ల తర్వాత బ‌ల‌హీనమైన ఆ పార్టీకి ఉత్త‌ర తెలంగాణ వేదిక‌గా తిరిగి జ‌వ‌స‌త్వాలు నింపేందుకు గులాబీ బాస్ సిద్ధ‌వుతున్నారు. ఈ నేప‌థ్యంలో సీఎం రేవంత్‌రెడ్డి (Revanth reddy) వ్యూహాత్మ‌కంగా కాళేశ్వ‌రం అంశాన్ని తెర‌పైకి తెచ్చారు. కౌంట‌ర్‌గా అదే రోజున మేడిగ‌డ్డ వ‌ద్ద భారీ బ‌హిరంగ స‌భ‌కు సిద్ధ‌మ‌య్యారు.
టార్గెట్ బీఆర్ఎస్సే..
దాదాపు రూ.లక్ష కోట్ల‌తో క‌ట్టిన కాళేశ్వరం.. కూలేశ్వ‌రంగా మారింద‌ని.. ఇప్ప‌టికే ప్రాజెక్టు అవినితీపై ప‌లు వేదిక‌ల ద్వారా ఎండ‌గ‌ట్టిన ముఖ్య‌మంత్రి మ‌రోసారి బీఆర్ఎస్ టార్గెట్‌గా విమ‌ర్శ‌లు చేసేందుకే ఈ స‌భ నిర్వహిస్తున్న‌ట్లుగా పొలిటిక‌ల్ స‌ర్కిల్‌లో టాక్. కుంగిన మేడిగడ్డతో పాటు సుందిళ్ల, అన్నారం బ్యారేజీలను ఆ రోజున పరిశీలించ‌నున్నారు. పునరుద్ధరణ పనులపై అధికారులతో సమీక్షించి.. అనంత‌రం బ‌హిరంగ స‌భ‌లో త‌న పంచ్ డైలాగ్‌లతో గులాబీ పార్టీపై విరుచుకుప‌డే అవకాశం లేక‌పోలేదు.
అధిష్టానానికి చేరువ‌వుతూ..
డీలిమిటిష‌న్ కు సంబంధించి లోక్‌స‌భ‌లో 50శాతం సీట్ల పెంపు అంశంపై.. ద‌క్ష‌ణాది రాష్ట్రాల‌కు తీరని అన్యాయం జ‌రుగుతుంద‌ని మొద‌టి నుంచి గొంతెత్తిన రేవంత్.. హైబ్రిడ్ మోడ‌ల్ అంశాన్ని తెర‌పైకి తెచ్చారు. ఆయా రాష్ట్రాల‌ ముఖ్య‌మంత్రుల‌ను ఏక‌ తాటిపైకి తేవ‌డంలో స‌ఫ‌లీకృతం అయ్యారు. తాజాగా 131వ రాజ్యాంగ స‌వ‌ర‌ణ‌ బిల్లు వీగిపోవ‌డంలో సీఎం ఎనుముల కీల‌కపాత్ర పోషించి అధిష్టానం దృష్టిలోనూ ప‌డ్డారు. ఫ‌లితంగా మూడు బిల్లుల‌ను ఒకేసారి చ‌ట్టాలుగా మార్చుదామ‌నుకున్న బీజేపీ స‌ర్కారుకూ గ‌ట్టి షాక్ ఇచ్చారు.
పార్టీ బ‌లోపేతం దిశ‌గా..
మ‌రోవైపు పార్టీలో వ‌ర్గ‌పోరుకు క్ర‌మంగా చెక్ పెడుతూ వ‌స్తున్నారు. గీత దాటే నేత‌ల విష‌యంలో అధిష్టానానికి వివ‌రిస్తూ త‌న‌దైన శైలిలో ముందుకు సాగుతున్నారు. పార్టీపై నెగిటివ్ ప్ర‌భావం ప‌డ‌కుండా పావులు క‌దుపుతున్నారు. తాజాగా వెలుగుమ‌ట్ల ఘ‌ట‌న విష‌యంలో న‌ష్టాన్ని గుర్తించిన ఆయ‌న మ‌రింత‌ పెర‌గ‌కుండా స‌త్వ‌ర చ‌ర్య‌ల‌కు ఆదేశించారు. అంతేకాదు.. క్షేత్ర‌స్థాయిలో ‘హ‌స్తం’ బ‌లోపేతంపై ఫోక‌స్ పెంచారు. పార్టీ ర‌హిత ఎన్నిక‌లు అయినా పంచాయ‌తీ పోరును ప్ర‌తిష్టాత్మ‌కంగా తీసుకున్నారు. ఫ‌లితాల‌పై ప్ర‌భావం చూపారు. మున్సిప‌ల్ లోనూ అదే తీరు కొన‌సాగించారు. రానున్న ప‌రిష‌త్‌, జీహెచ్ఎంసీ ఎన్నిక‌ల్లోనూ ఇదే ఒర‌వ‌డి కొన‌సాగించాల‌ని భావిస్తున్నారు. నాడు రాజ‌శేఖ‌ర‌రెడ్డి ముఖ్య‌మంత్రిగా వ్య‌వ‌హరించిన తీరును అనుస‌రిస్తున్నారు. రే’వ‌న్‌’త‌న్న‌గా ప్ర‌జ‌ల గుండెల్లో ముద్రవేసుకోవాల‌ని ఆరాట‌ప‌డుతున్నారు.

ఇది కూడా చదవండి :  కులం లెక్కలు.. ఐక్యతా రాగాలు..మారనున్న రాజకీయాలు