Tamilnadu politics | ద్రవిడ పార్టీలు మళ్లీ ఒక్కటవుతున్నాయా అంటే అవుననే సమాధానం ఇస్తున్నాయి తాజా పరిస్థితులు. తమిళనాట రాజకీయాలు గంటగంటకు మారుతున్నాయి. అసెంబ్లీ ఎన్నికల్లో టీవీకే అతిపెద్ద పార్టీగా అవతరించినా.. ప్రభుత్వ ఏర్పాటుకు 10 సీట్ల దూరంలో నిలిచింది. కాంగ్రెస్ ‘హస్తం’ అందించినా పూర్తిస్థాయిలో మెజారిటీ దక్కని పరిస్థితి. ఈ క్రమంలో విజయ్ ప్రభుత్వ ఏర్పాటుపై నీలినీడలు కమ్ముకుంటున్నాయి.
ఎవరి బలాలు ఎంతెంత..
తాజాగా జరిగిన తమిళనాడు అసెంబ్లీ ఎన్నికల్లో ఓటరు తీర్పు విలక్షణంగా మారింది. ఏ పార్టీకి పూర్తిస్థాయి మెజారిటీ దక్కని పరిస్థితి. 234 సీట్లున్న అసెంబ్లీలో 108 స్థానాలతో టీవీకే(Tvk) అతిపెద్ద పార్టీగా నిలిచింది. తర్వాత స్ధానంలో డీఎంకే(Dmk)కూటమి 73, అన్నాడీఎంకే(anna Dmk) కూటమి 53 నిలిచాయి.
పార్టీల వారీగా పరిశీలిస్తే..
టీవీకే- 108 సీట్లు, డీఎంకే – 59, అన్నాడీఎంకే – 47, కాంగ్రెస్ – 5, పీఎంకే – 4, ఐయూఎంఎల్ – 2, సీపీఐ – 2, వీసీకే 2, సీపీఎం -2, బీజేపీ 1, డీఎండీకే1, ఏఎంఎంకేఎంఎన్కేజెడ్ 1.
డీఎంకే, అన్నాడీఎంకే మధ్య చర్చలు?
దశాబ్దాలుగా బద్దశత్రువులుగా నిలిచిన డీఎంకే, అన్నాడీఎంకే ప్రస్తుతం ప్రభుత్వ ఏర్పాటుకు ఫోకస్ పెంచినట్లుగా తెలిసింది. విజయ్కు పీఠం దక్కకుండా చకచక పావులు కదుపుతున్నట్లు సమాచారం. డీఎంకే 59, అన్నాడీఎంకే 47 సీట్లను సాధించగా జాతీయ పార్టీలను మినహాయంచి లెఫ్ట్, ఇతర పార్టీలతో కలిపి ప్రభుత్వం ఏర్పాటు చేయాలని యోచిస్తున్నట్లు తెలుస్తోంది. చెరి రెండున్నరేళ్లు పాలన సాగించేలా ఒప్పందం సాగుతున్నట్లు సమాచారం.
అసలేం జరుగుతుంది..
అతిపెద్ద పార్టీగా అవతరించిన విజయ్ పార్టీకి.. ఎన్నికల్లో డీఎంకేతో కలిసి పోటీ చేసిన కాంగ్రెస్ మంగళవారం టీవీకే కు మద్దతు ప్రకటించింది. మ్యాజిక్ ఫిగర్ 118 కాగా.. హస్తం మద్దతుతో కలిపి విజయ్ బలం 112(విజయ్ రెండు చోట్ల గెలుపు పరిగణలోకి తీసుకొని)కు చేరింది. మరో ఆరుగురు మద్దతు అవసరం కాగా.. గవర్నర్ను కలిసి ప్రభుత్వ ఏర్పాటుకు అనుమతి ఇవ్వాలని దళపతి కోరారు. అయితే పూర్తి మెజారిటీ ఉండాల్సిందే అని గవర్నర్ స్పష్టం చేసినట్లు తెలిసింది. ఈ క్రమంలో ఒక్కసారిగా డీఎంకే , అన్నాడీఎంకే పొత్తుల చర్చలు ఆసక్తికరంగా మారాయి.
ఇది కూడా చదవండి.. ‘కమలం’ నెక్స్ట్ టార్గెట్.. తెలంగాణ.. రంగంలోకి దిగుతున్న మోదీ
