Vijay what next | అవును మీరు వింటుంది నిజమే.. టీవీకే ఇక సొంతంగా ప్రభుత్వం ఏర్పాటు చేయనుందా అంటే అవుననే సంకేతాలు వినిపిస్తున్నాయి. ఆ స్ట్రాటజీ వర్కవుటయితే ప్రస్తుతం తమిళనాడుకే పరిమితమైన విజయ్ ఇక దేశరాజకీయాల్లోనూ తనదైన మార్కు చూపే అవకాశం లేకపోలేదు.
విజయ్ రాజీనామా అస్త్రం..?
మే 5న విడుదలైన ఎన్నికల ఫలితాల తర్వాత తమిళనాట చోటు చేసుకుంటున్న రాజకీయ పరిణామాలు క్షణక్షణం ఉత్కంఠ కలిగిస్తున్నాయి. నాలుగు రోజుల్లోనే 40 ట్విస్టులు చోటు చేసుకోగా దేశం మొత్తం అరవ పాలిటిక్స్ను ఆసక్తిగా వీక్షిస్తోంది. గవర్నర్ వ్యవస్థపై సర్వత్రా చర్చ మొదలైంది. అసెంబ్లీ ఎన్నికల్లో టీవీకే(TVK) 108 స్థానాలతో ముందు వరుసలో నిలిచిన విషయం తెలిసిందే. మ్యాజిక్ ఫిగర్ 118కి మరో పది అడుగులే. మిగతా కూటములకు ఇది అందనంత దూరంలో ఉంది. అయినా విజయ్ పార్టీకి గవర్నర్ నుంచి మూడు సార్లు చేదు అనుభవమే ఎదురైంది. మరోవైపు బద్ధశత్రువులైన డీఎంకే, అన్నాడీఎంకే చేతులు కలపడం తమిళ రాజకీయాల్లో సంచలనంగా మారింది. ఒకవేళ వారికి గవర్నర్ అవకాశం ఇస్తే టీవీకే అధినేత సంచలన నిర్ణయం తీసుకోనున్నట్లుగా తెలుస్తోంది. మొత్తం 107 మంది (ఇందులో విజయ్ రెండు చోట్ల గెలుపొందాడు) రాజీనామా చేసి తిరిగి ఎన్నికలకు వెళ్లే యోచనలో ఉన్నట్లుగా ఆ పార్టీ వర్గాల నుంచి వినిపిస్తుంది.
మారుతున్న పరిణామాలు..
ఇప్పటికే టీవీకే కు కాంగ్రెస్ (5)మద్దతు ప్రకటించింది. శుక్రవారం జరిగిన చర్చల సందర్భంగా లెఫ్ట్ పార్టీలు (చెరి రెండు చొప్పున 4సీట్లు) సపోర్ట్ చేస్తామని వెల్లడించాయి. వీసీకే (2) మద్దతు ప్రకటించినా తర్వాత వెనక్కి వెళ్లడం ఆసక్తికరంగా మారింది. ఐయూఎంఎల్ ముందు ఓకే అన్నా ఆ వెంటనే మాట మార్చడంతో మళ్లీ మొదటికి వచ్చినట్లయింది. ఈ క్రమంలో శనివారం ఉంటుందనుకున్నవిజయ్ ప్రమాణస్వీకార కార్యక్రమం రద్దవడం గమనార్హం.
దళపతి ఏం చేయబోతున్నారు..
ఒకవేళ ప్రభుత్వ ఏర్పాటుకు గవర్నర్ అనుమతించకపోతే విజయ్ సుప్రింకోర్టును ఆశ్రయించే అవకాశమున్నట్లు తెలుస్తోంది. అంతేకాకుండా తన పార్టీ నుంచి గెలిచిన వారందరితో రాజీనామా చేయించాలని యోచిస్తున్నట్లుగా సమాచారం. ఇదే జరిగితే అసెంబ్లీ రద్దయ్యే అవకాశంతో పాటు తాత్కాలికంగా రాష్ట్రపతి పాలన.. తర్వాత ఎన్నికలు వచ్చే అవకాశం ఉంటుందనే చర్చ సాగుతుంది. మళ్లీ ఎన్నికలు వస్తే ప్రస్తుతం ఉన్న సానుభూతి విజయ్ కు రికార్డు స్థాయి స్థానాలను తెచ్చిపెట్టే అవకాశం లేకపోలేదు. అంతేకాకుండా భవిష్యత్లో దేశ రాజకీయాల్లోనూ కీలకంగా మారే అవకాశాలు ఉన్నట్టు తెలుస్తుంది.
బలాబలాలు ఇలా..
234 సీట్లున్న తమిళ అసెంబ్లీలో బలాబలాలు పార్టీల వారీగా.. టీవీకే-108 సీట్లు, డీఎంకే – 59, అన్నాడీఎంకే – 47, కాంగ్రెస్ – 5, పీఎంకే – 4, ఐయూఎంఎల్ – 2, సీపీఐ – 2, వీసీకే 2, సీపీఎం -2, బీజేపీ- 1, డీఎండీకే-1, ఏఎంఎంకేఎంఎన్కేజెడ్ -1.
ఇది కూడా చదవండి.. ‘కమలం’ నెక్స్ట్ టార్గెట్ తెలంగాణ.. రంగంలోకి మోదీ
