AI Effect | ఆర్టిఫిషియల్ ఇంటెలిజెన్స్(AI) ప్రభావం ఇప్పటికే టెక్ కంపెనీలపై చూపుతుండగా.. తాజాగా బ్యాంకులపై కూడా పడింది. ఏఐ ఇప్పటికే వేలాది కొలువులను కొల్లగొడుతూ ఉపాధికి దూరం చేస్తున్న విషయం తెలిసిందే. తాజాగా ఈ కోవలోకే చేరింది ప్రముఖ అంతర్జాతీయ బ్యాంక్ అయిన స్టాండర్డ్ చార్టెడ్ బ్యాంక్. ఇందులో పనిచేసే దాదాపు 7,800 ఉద్యోగాలు ఊడిపోయే అవకాశాలు కనిపిస్తున్నాయి.
బ్యాంకులపై ప్రభావం
ఏఐ దెబ్బతో ఇప్పటికే సాఫ్ట్వేర్ రంగంలో కొలువులు కోల్పోతుండగా తాజాగా అంతర్జాతీయ బ్యాంకుల్లోనూ మొదలయ్యే సంకేతాలు కనిపిస్తున్నాయి. దీంతో ఆ ఉద్యోగుల్లో ఆందోళన మొదలైంది. ప్రముఖ అంతర్జాతీయ స్టాండర్డ్ చార్టెడ్ బ్యాంకు తాజాగా 15శాతం ఉద్యోగాల తొలగింపు ప్రక్రియకు శ్రీకారం చుట్టింది. ఈమేరకు ఆ బ్యాంకు సీఈవో బిల్ వింటర్స్ ప్రకటన సంచలనంగా మారింది. ఏఐ టూల్స్ ద్వారా తక్కువ ఖర్చుతో సమర్ధవంతమైన సేవలు నిర్వహించే అవకాశం ఉన్నందున ఈ నిర్ణయం తీసుకున్నట్టుగా ఆయన పేర్కొన్నారు. అయితే ఈ ఉద్యోగుల్లో ఎవరైనా పునఃశిక్షణకు ఆసక్తి చూపితే మాత్రం వారికి తదుపరి నియామకాల్లో ప్రాధాన్యం ఇస్తామని సీఈవో పేర్కొనడం గమనార్హం.
సర్వత్రా టెన్షన్
ఈ బ్యాంకు 2030లోగా సుమారు 7,800 మందిని ఇంటికి పంపించాలని నిర్ణయించింది. ఇందులో ఎక్కువగా భారత్లోని చెన్నై, బెంగళూరు వారున్నారు. అలాగే చైనాలోని షెంజెన్, పోలెండ్ రాజధాని వార్సాల్లో పనిచేసే ఎంప్లాయీస్ కూడా ఉన్నట్లుగా బ్యాంకు వర్గాల నుంచి తెలుస్తోంది. ఈ అంశం ప్రస్తుతం బ్యాంకింగ్ వ్యవస్థలో చర్చనీయాంశంగా మారింది. ఎప్పుడు ఏ బ్యాంకు ఏం నిర్ణయం తీసుకుంటుందోనని సర్వత్రా టెన్షన్ నెలకొంది.
ఇది కూడా చదవండి.. బీజేపీలో ప్రక్షాళన తప్పదా.. కొత్త సారథి తథ్యమేనా?
