TRS Name | టీఆర్ఎస్.. రెండు దశాబ్దాల పాటు తెలంగాణ రాజకీయాల్లో కీలకంగా వినిపించిన పేరు. స్వరాష్ట సాధనలో ముందు నిలిచిన గొంతుక. అయితే ఈ గులాబీ పార్టీ పేరు నాలుగేళ్ల క్రితం బీఆర్ఎస్ గా రూపాంతరం చెందిన విషయం విధితమే. సీన్ కట్ చేస్తే.. ఇప్పుడు ఆ పేరు మళ్ళీ తెర మీదికి వచ్చింది. పొలిటికల్ సర్కిల్ లో హాట్ టాపిక్ గా మారింది.
25న కవిత కొత్త పార్టీ
భారత రాష్ట్ర సమితి (బీఆర్ఎస్) నుంచి ఇటీవల బయటకు వచ్చిన కల్వకుంట్ల కవిత ఈనెల 25న కొత్త పార్టీ పెట్టనున్నట్లు ఇప్పటికే ప్రకటించిన విషయం తెలిసిందే. అయితే పార్టీ పేరు విషయంలో జాగృతి అధ్యక్షురాలు తాజాగా చేసిన ఓ కామెంట్ ప్రస్తుతం రాజకీయ వర్గాల్లో ఆసక్తి కలిగిస్తుంది. ‘బీఆర్ఎస్ గా మారిన తర్వాత ప్రస్తుతం టీఆర్ఎస్ పేరు ఖాళీగా ఉందని.. దానిని ఎవరైనా వాడుకోవచ్చని..’ మీడియా చిట్ చాట్ లో ప్రస్తావించిన అంశం ప్రస్తుతం సర్వత్రా ఆసక్తి కరంగా మారింది. ఈ నేపథ్యంలో కవిత ఏర్పాటు చేయబోయే పార్టీ టీఆర్ఎస్ అయి ఉంటుందనే చర్చ రాజకీయ వర్గాల్లో ఆసక్తి రేకెత్తిస్తోంది. గులాబీ పార్టీ వర్గాల్లోనూ కవిత పార్టీ ఏమిటా అన్నచర్చ జోరుగా సాగుతోంది.
టీఆర్ఎస్ నుంచి బీఆర్ఎస్ ఇలా..
తెలంగాణ రాష్ట్ర ఏర్పాటే లక్ష్యంగా 2001ఏప్రిల్ 27న కేసీఆర్ టీఆర్ఎస్ ను స్థాపించారు. తన ఉద్యమ పంథాతో దశాబ్దాల స్వరాష్ట్ర కల నెరవేర్చారు. ఫలితం 2014లో తెలంగాణకు తొలి ముఖ్యమంత్రి. 2018లోనూ రెండోసారి అధికారంలోకి వచ్చారు. రాష్ట్ర రాజకీయాల్లో తిరుగులేని శక్తిగా ఎదిగారు. దేశ రాజకీయాల్లోనూ కీలకంగా మారాలని భావించారు. ఈ క్రమంలో 2022 అక్టోబర్ 5న పార్టీ పేరును భారత రాష్ట్ర సమితి (BRS) గా మార్చారు గులాబీ బాస్. అయితే తదుపరి అసెంబ్లీ ఎన్నికల్లో ఆ పార్టీకి హ్యాట్రిక్ అవకాశం చేజారింది. పార్లమెంట్ ఫలితాలు సైతం ‘కారు’ పార్టీకి నిరాశ కలిగించడం గమనార్హం. ‘తెలంగాణ’ పే(రు)గు బంధానికి దూరం కావడమే పార్టీ ఓటమికి ఓ కారణంగా విశ్లేషకులు చెప్పుకొచ్చారు. ఓ దశలో మళ్లీ టీఆర్ఎస్ గా మారితే బాగుంటుందని పార్టీలోనూ చర్చ మొదలైంది.
సెంటిమెంటు పేరును వదులుకుంటారా?
ఉద్యమ పార్టీకి కలిసొచ్చిన టీఆర్ఎస్ పేరు వేరే వాళ్లకు వెళ్లదని.. ఈసీ కూడా తమ అనుమతి లేకుండా వేరే వాళ్లకు ఇచ్చే అవకాశం ఉండదని బీఆర్ఎస్ వర్గాలు అంచనా వేస్తున్నాయి. మీడియా చిట్ చాట్ లో కవిత కామెంట్స్ రాజకీయవర్గాల్లో చర్చనీయాంశంగా మారగా.. ఆమె పూర్వాశ్రమ పార్టీ బీఆర్ఎస్ ను కలవరపాటుకు గురి చేసింది. ఆమె ఏర్పాటు చేయబోయే పార్టీ టీఆర్ఎస్సా మరొకటా అనే సస్పెన్స్ కు తెరపడాలంటే ఈ నెల 25 వరకు ఆగాల్సిందే.
ఇది కూడా చదవండి : కోల్బెల్ట్పై ‘జాగృతి’ ఫోకస్.. ‘సేవ్ సింగరేణి’ పేరిట ముందడుగు
