అగ్రరాజ్యం అమెరికా అక్రమ వలసదారులపై ఫోకస్ పెంచింది. వారిని తిరిగి తమ సొంత దేశాలకు పంపించే కార్యక్రమానికి ఏడాది క్రితమే శ్రీకారం చుట్టింది. తాజాగా మరో బంపర్ అఫర్ ప్రకటించింది. స్వచ్ఛందంగా యూఎస్ వీడే వారికి ఇచ్చే నగదును మరింత పెంచింది. ఉచిత విమాన ప్రయాణం సైతం కల్పిస్తామని ట్రంప్ సర్కార్ తాజాగా వెల్లడించింది.
గత ఏడాది నుంచే..
అమెరికా హోంల్యాండ్ సెక్యూరిటీ విభాగం, పత్రాలు లేని వలసదారులకు 2,600( సుమారు 2.4 లక్షల నగదు) డాలర్ల ఎగ్జిట్ బోనస్, స్వదేశానికి ఉచిత విమాన ప్రయాణాలను అందించే ‘ప్రాజెక్ట్ హోమ్కమింగ్’ అనే స్వచ్ఛంద స్వీయ-దేశ బహిష్కరణ కార్యక్రమాన్ని నిర్వహిస్తోంది. 2025 జనవరి లో ప్రారంభించబడిన ఈ కార్యక్రమాన్ని సీబీపీ హోమ్ యాప్ ద్వారా చేపదుతోంది. క్రమబద్ధంగా దేశం విడిచి వెళ్లడాన్ని సులభతరం చేసే లక్ష్యంతో చేపట్టిన ఈ కార్యక్రమాన్ని ఇప్పటివరకు సుమారు 22 లక్షల మందికి పైగా వినియోగించుకున్నారు. కాగా, అక్రమ వలసదారుల్లో భారతీయులు కూడా ఉన్నారు.
ప్రాజెక్ట్ ముఖ్య వివరాలు..
- స్వచ్ఛందంగా అమెరికా విడిచి వెళ్లేందుకు నగదు ప్రోత్సాహకంగా 2,600 డాలర్లు అందిస్తారు.
- ఇది అధికారిక బహిష్కరణకు సురక్షితమైన ప్రత్యామ్నాయం. తద్వారా అరెస్టు లేదా నిర్బంధాన్ని నివారించవచ్చు.
- అక్రమ వలసదారులు తమ ఉద్దేశాన్ని నమోదు చేసుకోవడానికి, నిష్క్రమణను ప్లాన్ చేసుకోవడానికి, వ్యవహారాలు నిర్వహించుకోవడానికి సీబీపీ హోమ్ యాప్ ఉపయోగించవచ్చు.
- బలవంతపు దేశ బహిష్కరణకు దాదాపు18,245 డాలర్లు ఖర్చు అవుతుండగా.. ఈ కార్యక్రమం ద్వారా ఒక్కోవ్యక్తి కి సుమారు 5,100 డాలర్ల మాత్రమే కానుంది.
పత్రాలు లేని వ్యక్తులు ఆర్థిక సాయంతో క్రమబద్ధంగా, మానవతా దృక్పథంతో తమ ఇళ్లకు తిరిగి వెళ్లేందుకు ఈ కార్యక్రమం ఒక మార్గాన్ని కల్పిస్తోంది .
